ໂຮງຮຽນ ເຕັກນິກ-ວິຊາຊີບແບບປະສົມ ແຂວງຊຽງຂວາງເປີດການຮຽນ-ການສອນຄືນໃໝ່

20 June 2020 Written by ຂ່າວສານ 1645
Rate this item
(0 votes)

 ພາຍຫຼັງທີ່​ໂຮງຮຽນ​ເຕັກນິກ-ວິຊາ​ຊີບ ​ແບບ​ປະສົມ ​ແຂວງ​ຊຽງ​ຂວາງ ​ໄດ້​​ໂຈະ​ການ​ຮຽນ-ການ​ສອນ​ມາ​ໄດ້​ໄລຍະ​ໜຶ່ງ ຍ້ອນ​ການລະບາດ​ຂອງ​ພະຍາດ​ໂຄ​ວິດ-19 ​ໄດ້​ສົ່ງ​ຜົນ​ກະທົບ​ອັນ​ຮ້າຍ​ແຮງ​ຕໍ່​ຊີ ວິດ ​ແລະ ​ເສດຖະ ກິດ​ຂອງຫຼາຍໆປະເທດໃນ​ທົ່ວໂລກ, ໂດຍປະຕິບັດຕາມແຈ້ງການຂອງ​ທ່ານ​ນາຍົກລັດຖະມົນຕີ​ແຫ່ງ ສປປ ລາວ ສະບັບເລກທີ 06 ວ່າດ້ວຍການປ້ອງ​ກັນ ​ແລະ ສະກັດກັ້ນການລະບາດຂອງພະຍາດ ​ໂຄ​ໂລ​ນ່າ ສາຍພັນໃໝ່ໂຄວິດ-19 ແລະ ປະຕິບັດຕາມແຈ້ງການຂອງກົມອາຊີວະສຶກສາ ກະຊວງສຶກສາທິການ ແລະ ກິລາ ວາງ​ອອກຢ່າງເຄັ່ງ​ຄັດ, ​ໃນ​ທີ່​ສຸດມາຮອດວັນທີ່ 2 ມິຖຸນາ 2020 ນີ້ ໂຮງຮຽນ​ເຕັກນິກ-ວິຊາ​ຊີບ ​ແບບ​ປະສົມ ​ແຂວງ​ຊຽງ​ຂວາງ ​ກໍໄດ້ເປີດການຮຽນ-ການສອນຄືນໃໝ່ຢ່າງເປັນທາງການ.

​ໃນ​ໂອກາດດັ່ງກ່າວນີ້ທ່ານ ບຸນຄົງ ດວງພະວັນ ອໍານວຍການໂຮງຮຽນພ້ອມຄະນະຮ່ວມກັບຄະນະສະ ເພາະກິດຂັ້ນແຂວງໃນການປ້ອງກັນ ແລະ ສະກັດກັ້ນການລະບາດຂອງພະຍາດ ໂຄວິດ-19 ໄດ້ລົງຕິດຕາມກວດກາ​ຄວາມພ້ອມດ້ານຕ່າງໆຂອງຄູອາຈານ ແລະ ນັກຮຽນໃນແຕ່ລະສາຂາວິຊາຮຽນໃນການຈັດຕັ້ງປະຕິບັດການຮຽນ-ການສອນ ພ້ອມ​ທັງໃຫ້ຄໍາແນະນໍາກ່ຽວກັບການປ້ອງ​ກັນການລະບາດຂອງພະຍາດອັກເສບປອດ​ໂຄ​ໂລ​ນ່າສາຍພັນໃໝ່ ໂຄວິດ-19 ​ເຊິ່ງ​ເປັນ​ພະຍາດ​ທີ່ອັນຕະລາຍ​​​ຕໍ່​ຊີວິດ​ຂອງ​ຄົນ​ເຮົາສາມາດ​ແຜ່​ເຊື້ອ​ຈາກ​ຄົນ​ສູ່​ຄົນ​​ໄດ້ຢ່າງ​ໄວວາ ​ແລະ ​ເສຍ​ຊີວິດ​ຢ່າງ​ກະທັນຫັນ​ເມື່ອ​ບຸກຄົນ​ໃດ​ບຸກຄົນ​ໜຶ່ງ​ໄດ້​ຮັບ​ເຊື້ອພະຍາດ​ດັ່ງກ່າວ, ສະ​ນັ້ນ​ຂໍ​ໃຫ້​ທຸກ​ຄົນ​ຈົ່ງ​ມີ​ສະຕິປ້ອງ​ກັນ​ຕົນ​ເອງ ​ແລະ ປະຕິບັດ​ຕາມຂໍ້​ກຳນົດ​ຂອງຄະນະສະເພາະກິດຂັ້ນຕ່າງໆວາງອອກຢ່າງ​ເຂັ້ມ​ງວດ ​ໂດຍ​ຄວບ​ຄູ່​ກັບ​ການ​ຮຽນ-​ການ​ສອນໃຫ້ໄດ້ຮັບປະສິດທິຜົນສູງ, ​ເປັນ​ຕົ້ນການຮັກສາໄລຍະຫ່າງ 1 ແມ້ດຂຶ້ນໄປ, ​ໃສ່ໜ້າກາກອານາໄມທຸກ​ຄັ້ງ​ເວລາ​ຂຶ້ນຫ້ອງຮຽນ ຫຼື ຢູ່​ຮ່ວມ​ກັບ​ກຸ່ມ​ຄົນ​ຈໍານວນ​ຫຼາຍ, ຈັດສັນບ່ອນລ້າງມືຢູ່​ແຕ່ລະຈຸດຂອງຫ້ອງຮຽນໃນພາກທິດສະດີ ແລະ ໂຮງຊ່າງຝຶກພາກປະຕິບັດຕົວຈິງ​ໃຫ້​ລະອຽດ ໂດຍການ​ລ້າງ​ມືໃສ່ສະບູ່ ຫຼື ເຈວລ້າງ​ມືທຸກ​ຄັ້ງ, ແຍກຫ້ອງຮຽນອອກເປັນຫຼາຍຫ້ອງເພື່ອບໍ່ໃຫ້ແອອັດ, ທ່ານ ບຸນຄົງ ດວງພະວັນ ຍັງໄດ້ສະແດງຄວາມຊົມເຊີຍຕໍ່ກັບຜົນຂອງການກວດວັດອຸນຫະພູມຮ່າງກາຍຂອງຄູ-ອາ ຈານ ແລະ ນັກຮຽນປີທີ 2 ແລະ 3 ໃນຈໍານວນ 250 ຄົນ ເຫັນວ່າບໍ່ພົບຜູ່ທີ່ຕົກຢູ່ໃນກໍລະນີສົງໃສແຕ່ຢ່າງໃດ, ທ່ານຍັງໄດ້ເນັ້ນໜັກໃຫ້ທຸກຄົນຈົ່ງມີສະຕິລະວັງຕົວຕື່ມໃນການຮັກສາສຸຂະພາບເປັນສໍາຄັນ ໂດຍຄວບຄູ່ກັບການຮຽນ-ການສອນໃຫ້ບັນລຸຕາມຈຸດປະສົງເປົ້າໝາຍ.

(ພາບ+ຂ່າວ ໂດຍ: ຄຳເພົາ ປັດຕະນະ)

(ກວດແກ້ຂ່າວຄືນໂດຍ: ຄານສີສະຫວັນ ພົງພັກດີ)

Login to post comments

ຄົ້ນຫາ

ປະຕິທິນ

« September 2020 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30